照結構 好重要

「老婆，起身啦！」平時都係我早起身過老公，今日居然轉死性？皆因我哋今日會去照結構超聲波。

結構超聲波（下稱照結構）被喻為整個孕期最重要的檢查，由於公立醫院只會為有需要嘅孕婦照結構，大部分人都會自行搵私家醫生檢驗。Audrey光顧嘅診所收費為$2,000，成個過程約20-30分鐘。

你可能會問︰「每個月去私家診所產檢，醫生都會照聲波，照結構同平日檢查有咩唔同？」

其實喺BB每個成長階段，照聲波嘅重點都唔同。譬如懷孕頭3個月係做唐氏綜合症篩查嘅時間，醫生一般會幫BB量度頸皮厚度；18-22周則係照結構嘅好時機，太早照某啲器官太細，未必睇得清楚，太遲又可能會被已發育嘅部位遮擋其他內臟嘅視綫；去到後孕期，照超聲波除咗可以監測BB嘅成長進度及羊水量，仲會睇下佢嘅胎位係咪正常、胎盤有無前置、可唔可以自然分娩等。

言歸正傳，當日醫生逐一仔細檢查及量度BB嘅結構及內臟，包括頭骨、腦、心、肺、胃、腎、脊骨及四肢等。老實講，普通人根本唔明眼前嘅影像有咩含義，睇咁耐都只係想聽醫生講句「BB一切正常」。

起初Audrey以為照結構定會使用3D、4D技術，點知醫生幾乎全程用2D走天涯，只係最後幫BB影咗張3D相留念。當時我心諗︰唔通醫生臨尾先記得開3D？後來上網查證，原來照結構2D已經足夠，3D、4D只係錦上添花。

萬一touchwood照完發現BB有嚴重缺陷，現行法例容許父母喺BB未滿24周前終止懷孕。當然，大家都唔希望出現咁嘅情況啦。

（本欄逢周一刊登）