懷孕體重可增加多少？

「咩話？我重咗六磅？！」懷孕初期某日上磅，見到磅數不自覺驚呼，嚇到老公喺梳化彈起。佢見我扁晒嘴，立即安慰︰「唔使擔心喎，重喺BB度啫，笑番啦媽咪！」當時我都信以為真，直至我走去照超聲波，發現阿B只有不足1cm大，又何來承受該六磅重量？我就清楚自己要控制體重。

老實講，陀B初期我胃口唔算好，間中作嘔作悶，但我同自己講︰「我唔食，阿B都要食啦！」如是者，每次我都勉強將食剩嘅半碗飯倒埋落口；再者，老公怕阿B唔夠營養，日日提我食營養丸，而我自己亦飲多咗牛奶，仲要係全脂，想唔肥都難！

後來做產檢，姑娘提醒我唔使刻意食二人分量。睇番醫管局小冊子，一般而言，陀B頭三個月媽媽大概會重0.5-2公斤（約1-4.4磅），我咁快就重咗六磅，明顯超晒標啦！

不過由懷孕第四個月起，BB會比之前大得快，媽媽亦會重多啲，每星期約增加0.5公斤（約一磅）。姑娘同我講，每個人的體重增長速度不一，只要整個懷孕期體重增加介乎7.1-16.7公斤（即約15.6-36.7磅，視乎你嘅BMI再仔細區分；本身已經過重嘅媽媽，磅數增長上限約為32磅），其實唔需要太擔心。

大肚婆超重，唔單止會造成儀容問題、覺得自己走晒樣咁簡單，更可能出現妊娠糖尿、高血壓等情況，增加分娩的難度；更甚或令BB出現巨嬰症、低血糖症等問題，大個亦較容易患有糖尿、高血壓及心腦血管病等，所以千祈唔好輕視體重問題呀！

（本欄逢周一、四刊登）