清胎毒食啲乜？

「我真係可以食？」出街食飯送西瓜果盆，阿媽居然邀請我食埋一份，原來唔經唔覺，我已經進入臨近分娩嘅「最後直路」，要開始「清胎毒」喇。

所謂清胎毒，一般會喺懷孕八、九個月之後進行，目的係去除孕婦體內嘅熱氣，以免將內熱傳畀BB，形成「胎毒」，否則出世後容易出現濕疹等皮膚問題，甚至會成日喊同扭計。

喺清胎毒階段，大肚婆一般會被允許進食一啲屬性較「涼」嘅食物，譬如西瓜、綠豆沙、椰青水等等，好多先前唔准食、怕滑胎嘅嘢都可以解禁。

係咪所有孕婦都需要清胎毒呢？No，視乎你嘅體質係咪燥熱，例如你可以睇下自己有無便秘，或者熱氣到生暗瘡或痱滋，如果有，就可能係要清胎毒嘅訊號喇。不過最穩陣，當然係諮詢中醫意見啦。

Audrey我懷胎八個月開始清胎毒，當時我喺網上超市買咗一箱支裝純椰青水返嚟「鎮宅」（每支350毫升，約$7.5，貪佢包送貨，慳水慳力），每星期飲兩、三次。另外，屋企人亦有煲腐竹雞蛋糖水及白蓮鬚茶畀我飲，大約一星期一次。

至於綠豆沙呢，我就過咗九個月先開始食，因為中醫話綠豆沙偏涼，建議臨近預產期先食，煲嘅時候可以落啲陳皮，話有行氣嘅功效，亦可以中和綠豆嘅涼性喎。

除咗清胎毒，大家仲要記住減少熱氣食物嘅input，食少啲炸嘢、辣嘢、容易致敏嘅嘢（如筍呀、海鮮等）；食多啲生果，當時我幾乎隔日就榨下果汁飲，BB出世後皮膚總算白滑見得人。

（本欄逢周一刊登）