做婚禮司儀奇事多 林盛斌遭「爆粗外父」玩謝

無綫J2全新清談節目《玲玲友情報》，找來堪輿學家麥玲玲主持，首集找來百足咁多爪的林盛斌（Bob）任嘉賓。一向是婚禮「金牌司儀」的Bob，自稱曾遭「醉爆社團外父」考起：「我試過喺一間星級酒店，女家屋企人應該有啲背景，尾段外父衝咗上台攞咗我支咪，然後指住新郎，好Godfather（教父）咁話『我同你講，你對我女好啲，如果你對佢唔好』，跟住佢就爆粗喇！」Bob亦試過「老貓燒鬚」，「嗰次請晒老爺奶奶、外父外母上台，我話『既然咁開心，不如三pair一齊錫錫』，我唔記得其中一pair係分開咗，然後佢哋好尷尬咁望住我。」

不過，Bob亦見證不少感動時刻，「陳家樂同連詩雅嘅（婚禮）致辭好感動，喺多謝屋企人時，家樂講番啱啱出嚟做藝人，未搵到咩錢，當時阿爸喺佢唔為意時偷偷地塞錢落佢度，佢一講就喊，連詩雅喊，阿爸嗰圍喊，連楊受成博士都忍唔住喊。」