孖黃宗澤張繼聰打出兄弟情 陳家樂剃頭行古惑嚇親人

由黃宗澤（Bosco）領軍的江湖片《紮職2》將於下月5日上映，Bosco在戲中與張繼聰、陳家樂同撈同煲，三兄弟打到天昏地暗之餘更劈爛道具刀。一向官仔骨骨的家樂，更刻意剃頭剷青添邪氣︰「我好少演呢類奸奸哋嘅人，要由小人物爭上位變大佬！」

2012年上映的《紮職》由陳偉霆主演，相隔逾十年，以新故事打造的《紮職2》集合黃宗澤、張繼聰及陳家樂三大型男，陽剛味濃；故事亦以古惑仔爭上位作背景，眾人打到飛起，充滿90年代黑幫電影風格。對於戲中大量動作及奔跑場面，阿聰拍得過癮︰「今次個個（演員）都多動作，我都拍得好開心。細個睇得多古惑仔片，今次好多都係埋身肉搏場面，好有以前睇戲嘅味道，好耐無呢啲咁地道嘅戲種。」

阿聰的動作戲不少，幸拍攝時僅受皮外傷；而家樂在戲中有跳天橋場面，他說：「我拍呢個鏡頭無受傷，亦唔算好危險，反而成場戲要喺尖東打到去彌敦道，跑足一晚，幾刺激，效果都好好，睇到網上討論區有人以為黑社會打交！」Bosco則指該場口是三兄弟被追殺，像真度極高：「真係有途人嚇到走去報警！」家樂即插嘴：「好多途人嚇親，啲刀手突然出嚟又爆晒粗，覺得幾真。」

劈爛刀嗌過癮

阿聰大讚《紮職2》拍出江湖片情懷，「劇本寫得幾好，講我哋三兄弟由細玩到大，行唔同嘅路；除咗打交場面，其他戲都有得發揮。」演戲經驗豐富的Bosco對打鬥場面駕輕就熟，拍得過癮，「我哋亂咁劈，連道具刀都劈爛，又有好多爛仔交，拳腳交加。」至於家樂今次亦有新嘗試，「第一部《紮職》自己都有份參與，當時戲份唔多；今次難得演呢類奸奸哋嘅人，要由小人物爭上位變做大佬，所以導演叫我剃頭剷青，希望喺觀眾面前搣甩固有印象。」

Bosco即取笑家樂：「我印象中家樂係官仔骨骨，以前未合作過，今次見到都嚇一嚇。」家樂笑說︰「身邊朋友見到都驚，剃頭個樣同我平時好唔同。」Bosco反而指自己跟戲中角色相似，「其實幾似平時嘅自己，又會照顧人，依家年紀大咗，唔通真係叫陳家樂做大佬咩！戲中我同阿聰當佢親細佬，打交都要佢企後面，最後痛心呢個親細佬性格大變，好有以前江湖片嘅元素！」

黃宗澤

髮型︰Kel Fung @HH salon.nail

化粧︰Cyrus Lee

服裝︰Zeana

形象︰Queenie Yu

張繼聰

髮型︰Jobby Lee

化粧︰Pinky Ku

陳家樂

髮型︰Kenrick Siu

化粧︰Khaki Yan

服裝︰Sandro

場地︰灣仔駱克道81號

撰文︰Steven

攝影︰林良明

美術：梁政敏