小鮮肉初嘗主持滋味 王智騫范麒智願拍BL劇

ViuTV綜藝節目《甜酸苦辣鮮》邀請主持新丁王智騫（Martin）和范麒智（Kenji）擔大旗，兩位小鮮肉的腹肌及麒麟臂成為焦點外，他們的「甜蜜」溫馨互動更令觀眾聯想起BL（Boy Love）。兩人感恩有份拍攝劇集《I SWIM》，讓更多人認識他們，又笑言絕不介意拍攝BL劇集，只要有演出機會便滿足。

王智騫與范麒智坦言，拍攝《甜酸苦辣鮮》時沒有刻意營造BL氛圍，只是製作組擔心氣氛不足，所以加入新元素，沒想到預告片一出，已狂吸30萬點擊，令他們驚訝又興奮。二人到台灣和新加坡挑戰味蕾感官，Kenji最難忘分成七級的台灣「大王麻辣乾麵」，他挑戰到第六級便投降，「一路食好似卸緊粧咁，個粧溶晒，直情麻痺到隻手無乜感覺，真係太辣！」Martin成功挑戰第七級，事前要簽生死狀，他吃完麵後呆足半小時，感覺似出現人生走馬燈一樣，認真誇張。

首次拍攝旅遊節目，他們認為甚有難度，有別於拍戲有劇本，今次攝影機一開，他們便要跟鏡頭有交流，盡量不要dead air。Martin讚Kenji進步不少：「我哋性格、風格唔同，我覺得佢對眼好有攻擊性，我好似比較慘同憂鬱啲！」Kenji指平日做模特兒經常chok住影相，所以被誤會惡形惡相，「其實私底下我蠢蠢哋又呆呆哋！」對於兩人經常「糖黐豆」，Martin說︰「以往多數一齊出活動，今次旅行後熟咗好多。（厭未？）還好，但每次落機都希望嚟緊幾日見唔到佢！（拍BL劇？）我無所謂呀，我好恨拍嘢，咩都鍾意拍，快啲搵我啦！BL劇我最深印象係《大叔的愛》，輕喜劇夠開心。」Kenji則喜歡泰國人氣CP Bright及Win。

Kenji感激爸爸范俊業支持

Kenji爸爸是著名足球員范俊業，Kenji亦是香港水球代表隊成員。「我好多謝爸爸媽媽從來無畀壓力我，壓力係來自自己。因為見爸爸喺踢波得到大家認知，有一定地位；我成日都諗，會唔會要達到佢嘅程度先得？爸爸反而叫我唔使諗咁多，又喺行動上支持我，有時夜收工，佢哋就算瞓晒覺，媽媽總會煲定湯畀我飲，爸爸又周不時送禮物，令我所有疲倦同煩惱都忘記晒！」而Martin曾揚言拒絕跳舞唱歌組男團，他現時變得不太抗拒，因拍劇令他得到很多不同技能，所以不排除任何嘗試。

化粧︰Agnes Yeung

髮型︰AL Leung（王智騫）、Oscar Shek（范麒智）

服裝︰Bonsai + Farme@Harvey Nichols / Christian Louboutin /Emphasis（王智騫）、Wooyoungmi@ Harvey Nichols / Versace / Christian Louboutin / Emphasis（范麒智）

撰文︰楊安莉

攝影︰馮凱宜

美術：梁政敏