楊明戴孝悼拿督莊寶 莊思明︰爸爸當佢係仔

莊鍶敏和莊思明的拿督父親莊寶上月28日於港怡醫院病逝，享年83歲。喪禮昨日於紅磡世界殯儀館舉行，今早出殯。思明男友楊明戴孝現身喪禮，由於親屬要守孝，思明透露與楊明今年內不會舉行婚禮。

莊鍶敏昨日與二弟莊順勝及兩位妹妹莊思華、莊思明，陪同母親到靈堂打點；身為莊家準女婿的楊明則戴孝現身，陪伴在思明身邊，亦不時扶實未來外母。靈堂布置簡潔，中央擺放莊寶面帶笑容的遺照，金色橫匾寫上「福壽全歸」；正前方擺放莊寶遺孀的粉紅色心形花牌，四位子女的花牌分別放在兩旁，而楊明的花牌則放在思明花牌旁邊。昨日楊受成、關寶慧及陳庭欣等到場致祭，莊鍶敏前夫楊秉逸亦現身送別。靈堂內外擺滿圈中人致送的花牌，包括周星馳、薛家燕、方中信、劉丹及樂易玲等。

莊鍶敏哭成淚人

莊鍶敏與思明一同受訪，期間莊鍶敏激動得哭成淚人，她透露父親今天出殯後，明日會陪同爸爸遺體飛回馬來西亞，並在當地設靈，然後遵從父親遺願，讓他土葬在爺爺嫲嫲旁邊。她說︰「爸爸走嘅時候所有家人都喺身邊，佢希望我哋過得好好，堅強啲，呢段時間我哋會多啲陪媽咪，希望佢唔好太擔心我哋。」至於思明表示男友楊明十分傷心，「爸爸好錫佢，當佢係仔咁看待。」早前盛傳思明及楊明今年內拉埋天窗，由於要守孝，思明直言婚禮會延期，「今年內一定唔會，處理好爸爸嘅事先。」

採訪、攝影（部分）︰倪小珊

美術︰梁政敏