與梁朝偉相識40載 呂方爆由波友變好友

59歲的呂方將於下周六、日假紅館舉行一連兩場《呂方Classic 40演唱會》，前晚他接受新城電台《傾心相聚》訪問，大談鮮為人知的往事。呂方於1983年奪得新秀歌唱比賽冠軍入行，翌年接拍劇集《新紮師兄》而廣為人識，他笑言全靠木訥及戇直外表獲得角色。劇集出街後，呂方人氣急升，「嗰時有啲妹妹仔會衝嚟叫我簽名，即刻有虛榮心。」

呂方與影帝梁朝偉也是結緣於《新紮師兄》，「拍劇初期大家嘅交流唔多，因為我唔講嘢，佢又唔講嘢，好彩當年成班後生仔，好似劉青雲、關禮傑都比較活潑，帶動埋我哋。（你與偉仔成為交心朋友？）開工日夕相對，有時凌晨三點收工，第二朝六點開工，成班人會去打桌球兩個鐘，之後直接去開工，係好好玩嘅經驗。」