呂爵安 陳欣妍 全能新人闖天下

對人氣男團MIRROR成員呂爵安（Edan）來說，今年可謂豐收之年，單計上半年已獲歌影視、主持、綜藝等多方面的機會；最近他夥拍「新晉女神」陳欣妍（Shirley）為動畫電影《反轉方舟動物團》配音，更獲Shirley大讚是「全能小王子」。不過Edan直言現階段並不敢當，但希望總有一日能勝任「全能」美譽。

呂爵安今年單飛出道，推出兩首歌《E先生連環不幸事件》及《小諧星》成績理想，MV點擊率已分別破670萬及180萬，首度擔正的劇集《大叔的愛》更掀起全城熱話，多棲發展大受歡迎。Edan最近為卡通電影《反轉方舟動物團》一嘗配音滋味，他大讚過程好玩，「配卡通片可以用另一把聲、誇張啲，或者做特別嘅音效，好有趣。」Edan為《反》片獻出聲演第一次，同樣首度配音的陳欣妍，認為配音具挑戰性︰「平時演戲係由零開始，建立一個角色，但今次要做好多功課，配合番個角色同電影。」

Edan想學熊貓食玩瞓

Edan在片中聲演性格樂天的長鼻獸菲尼，他指角色性格跟自己很相似，更搞笑自誇說︰「都係好鍾意幫人、好乖同好可愛，哈哈！」而Shirley則聲演鬼主意多多的黑面狐莉亞，她說︰「莉亞好想快啲變大人，我細個都一樣好想變大人，但依家大咗又想變番細個。」

雖說角色性格跟自己相像，但Edan卻認為以熊貓來形容自己更合適，「因為熊貓好懶，食完就瞓，我都好鍾意瞓覺、懶同hea，但依家做嘢唔容許我懶囉。」Shirley就自覺似大笨象，因為她喜歡大象的慢吞吞與和平，Edan即笑說︰「大笨象好大嚿喎！笨嗰方面都好似？哈哈！」Shirley即更正自己是「小象」，絕非又大又笨。

Edan和Shirley首度合作配音相當愉快，他們期待有機會再度合作拍戲，但Edan竟然想跟女神Shirley有非一般的親密關係：「我希望我哋演母子！因為Shirley煮嘢食好叻，可以好似媽咪咁照顧我，而我又鍾意被照顧，咪畀機會佢發揮下。」Shirley聞言即時落閘，大聲嬌嗔說︰「唔好啦！我唔想做媽咪住…做管家或者工人姐姐都可以嘅。」

Shirley唔想演媽咪

提到兩人可嘗試演情侶，並加插「自肥」親熱戲，Edan即笑說︰「我唔想畀人打死喎！」Shirley也說︰「我先驚啦，你咁多fans。」Shirley反而希望與Edan一同拍喜劇︰「我好鍾意Edan嘅喜感，因為有喜感係好難，唔係夾硬唧人笑，而係好自然令人想笑，佢絕對係『全能小王子』。」獲讚的Edan謙稱︰「唔敢當，我絕對唔係，仲有好大段距離。我的確想每一個範疇都做到，但『全能』係樣樣都好叻，我只係啱啱起步，希望將來真係可以做到啦。」事實上，Edan及Shirley都是正冒起的矚目新星，兩位新晉男神、女神的事業發展讓人期待。

撰文︰陳子楠

美術︰梁政敏

攝影︰二寶