大肚余香凝為視障人士獻聲

腹大便便的余香凝（Jennifer），早前與Super Girls獲電台邀請，為不同劇集擔任口述影像員，以聲音將娛樂帶給一班視障人士。Jennifer事前到盲人輔導會學習口述影像，她直言難度甚高︰「因為疫情關係，我只係上咗一堂，喺堂上學習點樣形容圖案，身邊朋友再照我描述畫番出嚟，已經覺得好難，你要喺有限時間內講得好清楚，考驗表達能力同分析能力，同埋對圖案嘅理解能力。」

至於Super Girls成員陳穎欣（Yanny）、蔡明思（Jessica）及吳嘉熙，則為口述影像與視障人士合作拍攝宣傳片，Yanny為劇集配旁白時分心：「因為配音套劇集Jessica有份演，情節好緊張、好慘同好感動，所以忍唔住走入呢個情緒，搞到鼻都紅晒。」