拋金句避談結婚 阿Sa要男友送40萬鑽戒

蔡卓妍（阿Sa）與「百億麻將館太子爺」男友石恆聰屢傳分手，昨日阿Sa出席珠寶品牌活動，透露男友曾送戒指給她，雖然避談是否求婚，但就甜絲絲望着手中價值近40萬的戒指謂︰「叫佢送呢個心心相印戒指畀我啦！」一句粉碎分手傳言。

阿Sa昨日與林愷鈴、倪晨曦到中環出席珠寶活動，身上佩戴價值逾270萬元珠寶首飾的她，貴氣十足。阿Sa透露有收藏珠寶的習慣，但並不是嫁粧，她表示︰「其實係我媽咪攞我啲錢去買，然後話係留畀我，佢買過最貴嘅一粒鑽石畀我有七位數。（男友有送戒指畀你？）OK啦，無成日送。」問到是否收求婚戒指？阿Sa即借用好姊妹鍾欣潼的金句︰「個個都戴戒指，唔通個個都係結婚咩！」想再收男友送的戒指？她望着手上價值近40萬的白金鑽戒說︰「咁叫佢送呢個心心相印戒指畀我啦！」

阿Sa近日忙於拍攝電影《金手指》，片中與影帝梁朝偉有不少對手戲，更有親熱戲，不過她表示︰「唔好將焦點放喺親熱戲到，其實套戲好多嘢值得留意，好似故事背景係70尾至80年代，服裝同髮型都會唔同。」阿Sa又透露偉仔在片場十分親切，經常與她和一班演員閒談，紓緩片場緊張氣氛，她表示︰「佢驚我哋驚，所以會同我哋一齊食飯傾偈，但佢唔會好似嗰種前輩會教你點做，佢鍾意teamwork。」

林愷鈴爆細佬無拍拖

另外，林愷鈴（Ashley）上周21歲生日，因她將慶生的相片上載到社交網，將18歲胞弟林卓毅（Addison）的樣子曝光，Addison高大帥氣，獲網民讚他有韓國oppa的影子。昨日Ashley笑言︰「我由細到大都覺得細佬靚仔。（細佬好受女仔歡迎？）佢個人比較cool，亦都應該無拍拖。佢比較內向，但鍾意做運動，我無好認真咁問佢有無興趣入娛樂圈，可以問下佢。」

採訪︰倪小珊

美術︰梁政敏