樂做御用人質 宣萱：做夠50次申請入健力士

宣萱與陳豪昨日宣傳《陀槍師姐2021》，經常於劇中做人質的宣萱，原來今次在《陀槍》刷新紀錄，從影以來第27次做人質。宣萱笑言開心成為「被挾持」紀錄保持者，又揚言若儲夠50次人質演出，便會申請打入健力士世界紀錄。

宣萱與陳豪昨日在宣傳活動上大玩考腰力遊戲，原來陳豪在《陀槍師姐III》扮過大賊，被「陳三元」滕麗名追捕，今次在新劇終於做警察。至於「TVB人質王」宣萱今次在《陀槍》第一集已被韋家雄挾持，她搞笑說：「我都唔記得自己做咗第26定第27次人質，今次都係邊拍邊寫劇本，呢個『被綁架』紀錄保持者都幾特別嘅。（想唔想入健力士紀錄大全？）過多20年，等我做夠50次先啦，不過做人質都幾開心呀。」

宣萱及陳豪在劇中演歡喜冤家，稍後可有感情戲？宣萱說：「最多都只係攬下，無激烈場面，因為疫情大家都好驚，親熱戲都盡量避開，加上有啲場景衞生設施比較差，拍攝期間亦都盡量避免，或者押後先拍。」

陳豪搬大屋靠晒陳茵媺

另外，陳豪最近忙於搬屋，他笑說︰「搬過隔籬屋囉，好彩Aimee（陳茵媺）搞掂晒，佢真係好叻，除咗湊小朋友，又打理間屋，佢淨係湊三個小朋友都癲咗。」他承認細屋搬大屋，但避談是否疫市賺千萬才搬屋。想追第四胎？他說：「夠喇，見好就收啦，有意外先再算，唔好絕我後路！」宣萱大讚陳豪夫婦有耐性照顧小朋友：「我自己就鍾意單身自由啲，依家我要照顧屋企四隻狗、三隻貓都夠晒忙，不過比起湊小朋友簡單好多，起碼唔使教佢哋讀書。」

採訪︰Pauline

編輯：李潔盈

美術：梁政敏