射擊鬥眼界 龔嘉欣射中黎耀祥要害

黎耀祥（祥仔）在無綫劇集《殺手》中飾演殺手「閻武」，與「Dark Angel」龔嘉欣有不少埋身肉搏的戲份，每次交手打得難分難解。他們由戲內鬥到戲外，嘉欣早前向祥仔「挑機」，大玩競技射擊運動，鬥槍法鬥眼界，結果嘉欣竟然技術性擊倒前輩，令祥仔接受懲罰做活靶！

當日黎耀祥與龔嘉欣比拼三個回合，大鬥眼界、速度及專注力。首回合，祥仔與嘉欣互射對方的肖像測試眼界，祥仔問嘉欣︰「你想我打你邊度？」嘉欣搞笑說︰「打我最大嘅地方，我對眼！」可惜祥仔眼界麻麻，打不中嘉欣的大眼睛；反而嘉欣「Dark Angel」上身，槍槍打中祥仔肖像的要害，完勝首回合。

第二回合，二人鬥快上彈開槍射靶，在劇中打戲連場的祥仔，以身手及速度輕鬆力壓嘉欣勝出，扳回一局。到了決勝局，祥仔與嘉欣鬥快跑到槍前換彈夾再射擊目標，雖然祥仔一直領先，可惜到射擊目標時遭嘉欣後來居上，結果嘉欣爆冷勝出，祥仔接受大懲罰，當成嘉欣的活靶，任射唔嬲。

實現合作心願無遺憾

事後，祥仔與嘉欣異口同聲表示今次首度參與競技射擊運動，大呼刺激又好玩。祥仔笑說︰「見到啲靶被打到瞓低晒，好似同個靶有交流，好有滿足感，加上揸槍真係好型，我都未試過咁有型。」至於勝出的嘉欣，則自爆有遠視︰「無諗過會贏，我平時掟飛鏢都掟唔中個靶。」

提到二人在《殺手》大演對手戲，他們即互笠「高帽」，嘉欣說︰「如果退休前未同祥哥合作過，絕對係遺憾！」她大讚祥仔極專業︰「有場戲祥哥拍到身水身汗、膝頭都腫晒，我等緊埋位食薯條，見佢一句怨言都無，坐埋一邊飲水，印象好深刻。」祥仔也大讚嘉欣是他見過最搏命的女演員，拍攝時甚少用替身，令他非常佩服。

撰文︰Pauline

編輯︰李潔盈

美術︰梁政敏