被屈介入唐詩詠緋聞 馬明：好抗拒話我係第三者

馬國明最近被傳做第三者，介入契妹唐詩詠及「教育界王力宏」陳思銘的緋聞，更驚傳詩詠已懷孕，馬明否認傳聞時大動肝火。昨日馬明出席新劇《BB大晒》記招，坦言十分介意被指是第三者，又戥詩詠被傳大肚不值。

馬國明昨日與岑麗香（香香）、吳岱融及龔慈恩等，出席《BB大晒》開鏡拜神儀式。馬明在劇中飾演市井粗人，成功「癩蛤蟆食天鵝肉」，娶得文青女神香香為妻，又笑言自己的角色十分專一。問馬明戲外是否同樣專一？他搞笑說：「唔知呢，男人個個都花心，諗下都好，但唔敢做。」

最近馬明被指介入唐詩詠與陳思銘的戀聞，更驚傳他令到詩詠大肚，馬明昨日說：「其實當時我係電話回應，唔係話好憤怒，但寫出嚟我嘅憤怒加大咗10倍。我真係唔知詩詠同個男仔（陳思銘）咩關係，亦唔會去八卦，除非詩詠自己講。我亦無嬲個男仔，只係想講清楚件事。」他舉例指當年拍《On Call 36小時》，也不知楊怡與羅仲謙蜜運：「其實我最介意佢哋（詩詠及陳思銘）新聞有我個名，我好抗拒人哋寫我係第三者。」他又表示詩詠懷孕的傳聞太假：「呢啲新聞對女仔嚟講唔好聽，好似背住個男仔同第二個一齊，佢（詩詠）唔係呢啲人，寫嘅人於心何忍呢，應該適可而止。」

唔知黃心穎紋身

另外，提到舊愛黃心穎的腿上紋了玫瑰圖案，馬明笑說：「咁我又唔知喎，最緊要佢自己開心，不過我就唔會紋身，因為我花心，驚紋咗米奇後，突然間又鍾意唐老鴨，不如貼印水紙好過。」有指心穎希望繼續在娛圈發展，馬明表示支持：「我都想每個朋友好，等公司安排。有啲事唔好睇得太重，唔好一啲事就抹殺咗佢多年嚟嘅努力，希望大家慢慢對佢改觀。」

採訪︰Pauline

編輯：李潔盈

美術：梁政敏