唔知大家自己或者係屋企人，有冇唔捨得丟嘢、鍾意儲物嘅習慣？有網民日前喺網上討論區以「有冇人屋企長輩完全唔X識斷捨離？」為題發帖，指其母喜愛在家中囤積各種物品，例如膠袋、過期食物及護膚品等，甚至係有逾20年歷史嘅食物盒等，令佢感到好煩惱。
囤積膠袋等各種物品
該名網民列舉其母囤積嘅物品，包括「膠袋個別卷埋一束打死結（冇裝野）」、「過期嘅未開封野食，醬，護膚品」、「用過嘅牙線籤，用紙巾包住收起」、「空嘅樽仔盒仔，每個入面塞舊紙巾」、「無限個食物膠盒，佢習慣每樣野買番黎都用刀刻年份，揾過刻住199X年嘅發黃膠盒」、「百幾個全新洗衫網袋，但用黎用去都係穿曬窿嘅舊網袋，拉鍊爛左就綁條橡筋打結用」等等。
問其他網民有冇方法
由於媽媽唔識斷捨離，令佢十分煩惱，「我次次都扯曬火搞到好似係我有病咁，鬧完佢唔明唔聽都算仲要驚佢唔開心」。為此，佢詢問其他網民：「有冇人屋企儲得癲過佢？『呢件第時會有用』相信大家聽過唔少，如果有方法令佢地停止儲自以為有用嘅垃圾，歡迎出招。」
唔少網民感同身受
對此，唔少網民都留言話自己感同身受，「有次執屋搵到十幾件1970-1980年代嘅衫，就算復古風都襯唔到啦」、「成屋都雜物唔肯掉，話得多變咗好似我唔啱咁」、「屋企仲有成百幾餅綠影帶，明明部機一早掉咗」。另網民指可以理解，「人老咗自然對舊野有種不捨之情架啦，例如我都唔捨得賣舊遊戲機舊帶」、「我諗你媽係嚴重缺乏安全感」、「事出必有因，了解多少少屋企人啦，一味逼佢地斷捨離，一定冇用」。大家點睇？
圖片來源：連登討論區