抱女友跑上大三巴求婚 林奕匡9月娶老婆

唱作歌手林奕匡（Phil）前晚於社交網站宣布喜訊，他上載一張攬住女友李靄璣（Rikko）在澳門名勝大三巴前甜蜜合照，Rikko捧着一束鮮花，臉上流露幸福笑容，Phil留言︰「She said yes！」公布女友已答應求婚。

剛宣布求婚成功的Phil，昨日出席「Roadshow綠星級環保大獎2016」頒獎典禮，他表示去年初已諗定買戒指求婚，不過女友講明求婚一定要打動到佢喊，否則不會答應，Phil笑言︰「原本諗住喺演唱會上求婚，又驚女友覺得唔夠誠意。」

女友開心爆喊

最終揀選到澳門求婚，原來他和女友在九年半前剛開始拍拖，曾抱着女友一口氣跑上大三巴樓梯頂，但礙於體力所限，最終無法完成，更笑言︰「嗰次差啲氣絕身亡！」而女友覺得那次約會是人生最浪漫的事，於是他策劃與女友同遊澳門，亦準備了鮮花，務求在女友不知情下送驚喜。

問到求婚一刻女友是否被感動到喊？Phil笑謂︰「佢有眼濕濕，當時佢好亂，我問佢『嫁畀我好唔好？』佢都唔識反應，之後返屋企佢先放聲大喊，其實遲咗幾個鐘囉，哈哈！」Phil坦言求婚成功令他放下心頭大石，更開心得失眠幾晚。問送了幾多卡鑽戒求婚？他形容是「開心卡」，不過他除跪地外，今次終能完成抱女友跑上樓梯頂的壯舉，更請朋友拍下整個求婚過程留作日後回憶。至於婚禮於九月在溫哥華舉行，會邀請好友馮允謙等觀禮，之後在港補擺喜酒。問到婚後會否立刻造人？他表示大家都喜歡小朋友，生育問題順其自然吧。

採訪、攝影︰Pauline

編輯：黃寶恩

設計：招潤洪