熊黛林自爆趕造人

熊黛林（Lynn）去年下嫁郭可頌後，今年正式以人妻身份派利市，恨生仔恨到出口的她，婚後也不設防，可是至今仍未有喜訊，在家鄉南京的嫂嫂最近誕下龍鳳胎，令Lynn這位姑姐恨得牙癢癢，更希望這種基因傳給她。

熊黛林昨日出席美容活動頒獎禮，去年跟郭可頌拉埋天窗的她被追問有好消息未？她扁扁嘴謂︰「仍在努力中，希望想今年可以成事啦，因為早啲生可以考慮生第二個。（想生幾多個？）最多兩個。（唔係計劃生三、四個？）間屋邊有位養三、四個BB，一個BB一間房，要別墅先得，依家間屋三間房，所以生一個先。」Lynn表示得悉Angelababy剛誕下麟兒，雖然未有時間探望對方，但已考慮買套BB衫送給她。

唔使鬆章畀奶奶

農曆新年將至，Lynn日前被目睹偕老公齊齊去買年花，「本身諗住買桃花旺人緣，但好似好急，又唔知香港有咩習俗，見到奶奶屋企有盆蘭花好靚，所以買咗蘭花。」問是否預備了利市？她笑言老公負責準備利市，自己負責派，預五位數封利市。以往農曆年例必返南京跟家人過節，今年Lynn就留港過年，「上星期嫂嫂生咗龍鳳胎，媽媽忙緊照顧佢哋，如果我同老公返南京，佢要走嚟走去招呼我哋，不如等夏天先返去，到時BB大個少少先抱。」問Lynn可渴望生孖胎？她點頭稱︰「都唔錯啊，一次過搞掂，不過湊兩個BB真係好辛苦。」

留港過年少不免跟奶奶打麻將，記者笑問她可會鬆章？Lynn自嘲︰「唔使特登（鬆章），我咁渣，好易出沖，我又唔識計番子，最叻食雞糊。」但因未與奶奶打過麻將，都有少少緊張！

採訪︰Pauline

攝影︰林良明

編輯︰林梓添

設計︰梁政敏