見紅了！生得未？

「啊，唔得啦，我要生啦！」平日睇電視，啲大肚婆總係好似「先知」咁，一有少少作動徵兆就知自己生得，事實根本唔係咁一回事。

之前聽產前講座，助產士提醒大家，一旦留意到以下三種訊號︰見紅、陣痛、穿水，三種出現其中一種已可去醫院待產。到底出現呢三種情況係點？以下係我嘅經驗︰

話說Audrey我最先出現係見紅，由見紅到真係生得，都隔咗超過一日。原先我以為見紅會好似M到流咁多血，查實佢只係一點點伴隨陰道分泌物排出嘅血絲。呢啲血絲係由於子宮收縮、BB嘅頭開始下墜入盆，導致血管破裂而出現，一般係暗紅色或啡色。之前助產士姨姨笑言，若果只係見紅，可以慢慢沖涼、洗頭兼食飯再入院都未遲。我都跟足佢咁做至去醫院。

但留意，若果出血量多，而且呈鮮紅色，咁就有機會係產前出血，記住立即求醫。我隔壁床嘅媽媽就因為咁，一入院就被建議催生。

另一種訊號係陣痛，即係因子宮收縮而出現嘅規律性嘅痛楚。我見紅入院後大半日先出現陣痛，一開初隔十幾分鐘痛一次，每次痛十幾秒，之後會愈來愈密，痛嘅時候亦愈來愈長。當時我喺App store下載咗個app紀錄陣痛頻率，等醫生檢查時話佢聽。

最後一種分娩訊號就係穿水喇。助產士叮囑，穿水後唔好沖涼，因為一旦穿咗羊水，意味BB住嘅地方再唔係密封，有機會被細菌感染，要盡快入院。記得穿水一刻，我彷彿聽見輕輕一聲「噗」，然後一股暖流從兩腿之間湧出，好似瀨尿咁成張床濕晒，好深刻。無幾耐子宮口已開到六度，可以轉到待產房等生仔。

（本欄逢周一刊登）