懷孕抽血 驗出BB先天病

「你只係陀咗三個幾月，咁快就知囝定囡？」阿媽好奇地問，又講起當年佢生我，到出世一刻先知我係女仔。其實得知BB性別只係無心插柳，驗先天病至係我嘅初衷。之前同大家介紹過，目前公立醫院會為孕婦驗血，睇下BB有無唐氏綜合症，準確度為80％至90％。

其實近年坊間有另一項更準確嘅檢驗方法叫「T21敏兒安」，同公院嘅唐氏篩查一樣，只需抽驗媽媽嘅血液，就可得知BB有無患有唐氏綜合症，另外仲可驗埋BB患「巴陶氏症」及「愛德華氏綜合症」嘅機率，準確度高達99.9％。

講起「T21」可以話係港人驕傲，因為呢項專利技術，係根據中大醫學院副院長盧煜明教授嘅發現成果而研發，2011年先推出。媽媽唔需要好似以前咁做入侵性檢查（即抽羊水或胎盤絨毛化驗），已能知悉BB狀況，減低流產風險。由於Audrey初次懷孕，老公同家人特別緊張，所以即使檢驗費成$7,000，諗都無諗就去私家診所預約做「T21」。

有無諗過點解咁神奇，驗媽媽嘅血，可以知道BB有無先天病？唔講唔知，原來懷孕期間，BB嘅DNA會釋放於媽媽嘅血液中循環，所以抽媽咪嘅血，亦間接攞到BB嘅DNA。

正常人體細胞當中含有23對染色體，若果第13、第18或第21對染色體異常，就有機會患上剛才提及嘅先天病。

呢個檢查同時會睇埋BB嘅性染色體係咪正常，因此驗完亦會得知BB性別。一般來講，幾日後就會知道結果，真係好有效率！

（本欄逢周一、四刊登）