返母校舉行簽名會 林家謙遇撞樣男歌迷

林家謙前日重返母校聖若瑟書院，舉行演唱會Blu-ray馬拉松式簽名會，由於參加歌迷眾多，最後由早上10點簽到晚上10點，為近千位歌迷簽名留念。簽名會有大人細路，亦有家謙的老師、同學和師弟等參加，更有一名跟家謙非常似樣的男歌迷。家謙笑言︰「我喺IG見過佢，我都嚇一嚇，心諗我幾時着過呢件衫，影輯咁嘅相？連我都認錯以為係自己，哈哈！」

家謙更把演唱會上有紀念性的有趣照片、個唱用過的七彩木鋼琴、巨型海豚都帶到現場供歌迷拍照留念。提到選址母校舉行簽名會，家謙表示︰「因為演唱會完咗之後，我個七彩木鋼琴一直放咗喺學校，諗下開學前，相約大家一齊再返個學都幾開心，所以就問學校借咗音樂室做簽名活動。」另外，家謙10月22日假倫敦The O2 Arena舉行一場演唱會，麥當娜及Lady GaGa亦曾在同一場地開騷。他最期待一個全新的rundown，給歌迷新鮮感。