李思捷設局成功 洪永城自爆瞞住老婆去揼骨

無綫遊戲節目《思家大戰》第三季後晚播出的一集，由洪永城（Tony）率領胡美貽（Nicole）、葉靖儀（Michelle）及倪嘉雯（Carmen）等任嘉賓。Tony與《思家大戰》主持李思捷原來甚有「淵源」，二人13年分別憑《走過浮華大地亞洲篇》及《玩嘢王》競逐《萬千星輝頒獎典禮》的「最佳節目主持」，最終Tony及黃翠如鍊贏思捷奪獎。

心有不甘的思捷後來在節目《今晚睇李》直踩Tony屋企「搶獎」，更「扑暈」對方，最終Tony反擊踩上《今晚睇李》奪回獎項，場面搞笑。十年過去，二人再度碰頭，思捷在問答環節明玩Tony，其中問題「老公放咗工之後會瞞住老婆同班friend做啲咩？」洪永城竟回答︰「按摩！」思捷打蛇隨棍上「盤問」他︰「有咩唔見得人？點解唔同得老婆（梁諾妍）講？揼咩骨要瞞呀？」玩謝昔日「宿敵」。