日圓難再展跌浪

剛剛過去嘅復活節期間，唔少同事都請多幾日假，連住紅日放咗個小長假。返到公司見到大家送嘅手信，自然開心，過去幾年未見過嘅分甘同味情況，終於又再出現。

唔少同事都係去日本走咗一轉，時間係短咗啲，大家都話唔夠喉，已經計劃緊幾時再出發。講開去日本，大家都話兌日圓開始貴，唔知幾時可以回返落去吸引嘅價位。

曉陽就話，其實日圓要好似舊年咁跌，都真係有啲難度。一來美元加息周期似乎就快結束，美元如果唔可以保持強勢，日圓好難跌落去；其二，日本央行仲有幾多政策可以用？睇嚟就唔係好多嘞，用嚟用去都係出口術。

復活節假期期間，日圓忽然急跌，主要係因為新行長喺就任典禮上表示，依家貨幣政策應該維持不變，繼而令日圓走低。整體上，新行長嘅發言比預期溫和，投資者暫時毋須太快下定論。

不過，有一點值得留意，早前油組減產，令紐約期油價格重上80美元水平，而日本能源嚴重依賴進口，或會令通脹進一步加劇，日本央行嘅寬鬆幣策或者未必能夠維持，保持日圓弱勢有一定難度。

短期嚟講，日圓要再現跌勢難度唔低，所以大家要去旅行急住兌錢，其實都毋須等咁多，畢竟旅行使費唔係多，最多咪差一碗拉麵？大家咁耐無去，一定唔會介意。

（本欄逢周四刊登）