暑期工的寶貴得着

曉陽公司最近嚟咗幾個暑期實習同事，話係同事，其實都係在學嘅同學仔，趁假期做暑期工，賺啲收入之餘，又攞啲工作經驗。

到底暑期工可以學到幾多嘢，曉陽一直都好疑惑，畢竟一個咩都唔識嘅在學大學生，公司都唔會交託好多任務畀佢哋，更多係做一啲行政工作，例如filing，或者安排吓活動名單、打吓電話做聯絡，學到幾多實際工作技巧，真係好難講。

但曉陽就覺得，有兩樣嘢暑期工其實一定會有得着，第一個一定係人際關係。

就算大家成日話大學就係社會縮影，但去到一間公司，呢班年輕人先會真正感受到職場有幾緊張同艱辛，尤其同人相處，做緊暑期工嘅朋友仔，不妨自己留意吓。

第二樣就係賺到嘅收入點樣安排。

暑期工唔係個個都有收入，但多少都會有啲津貼。呢筆唔多唔少嘅錢，可以點樣用？

大家一定覺得，曉陽會建議呢班同學仔嘗試用呢筆資金，開始學習理財同投資。但其實曉陽想講嘅係，佢哋學習嘅，應該係點樣安排呢筆錢。

呢筆錢可以用嚟買新iPhone，可以去一趟旅行，可以買部新電腦去返學，又可以報一個興趣班學多啲嘢，當然仲可以買投資產品為資產增值。

但無論用途係點，關鍵係佢哋要學識點樣分配收入。用錢要有一個目標，或者方向，即使係消費，都可能係實際需求，並無對錯之分，但一定唔可以漫無目的花錢，否則賺多多都無意義。

（本欄逢周四刊登）