資深不代表有價值

「無功勞都有苦勞吖！」

Simon為曉陽朋友，係某大機構嘅行政部高級經理，但就喺上個禮拜五被公司請食肥雞餐，所以約曉陽尋日食飯順便訴苦，上面嗰句說話就係出自Simon。

政府啱啱公布失業率重回低位，幾乎達至全民就業水平，但偏偏曉陽最近聽到最多就係某位同學被裁員、某位朋友被遣散。到底係統計數據有問題，抑或數字並無反映真實情況？

但講番Simon嘅情況，一句「苦勞」，係咪就等於公司唔可以或者唔應該辭退你？

好多人都覺得自己喺公司幾十年，幫公司立咗唔少汗馬功勞，所以就算要裁員，都唔應該係自己。

呢個可能係一個誤解，當你有幾十年經驗，做嘅依然係手板眼見工夫，咁老闆點解唔搵一個年輕後生、聽教聽話嘅新人去做？

其實，好多職場上被淘汰嘅中層，都唔明白如果無一技之長，或者無將經驗轉化成為智慧，你只會係一個貴啲嘅前綫員工，唔係有管理價值嘅資深員工。

唔知大家有無聽過，喺唔少日本企業，年紀大嘅員工不但唔會加薪，甚至會主動降薪。何解？原來係擔心被裁員，寧願收少啲人工都要繼續留低。

曉陽當然唔係叫大家主動降薪，但其實增加競爭力先係核心關鍵。尤其好多喺前綫打拼多年嘅朋友，點樣將經驗轉化成為管理能力？又或者提升自己綜合能力？就好比投資組合，一定唔好單靠一個項目，分散工具會更理想。

（本欄逢周四刊登）