留意行業動向 捕捉投資機遇

港股近期走勢偏軟，反而上個月美股業績期，多隻藍籌股出成績表之後都有好表現。

受惠人工智能（AI）同ChatGPT等發展，美國科技股上半年升勢強勁。截至7月31號，FANG+指數為表現最好嘅主要指數之一，年初至今升80.77%，納斯達克指數則升37.07%，證明跑贏大市。

當個別板塊有升勢，小投資者點樣捕捉？有兩點要留意，一個係主觀因素，另一個係客觀環境。

先講後者。如果大家有印象，應該記得舊年科技股係跌得好厲害，何解？主要因為美國開啟加息收水嘅步伐，一來令依靠集資發展嘅科企籌集資金遇到困難，二來存款利率回升，部分科企寧願將錢放喺保守投資產品，都唔投資喺發展上面。

所以踏入今年，當大家都認為美國聯儲局會減慢甚至暫停加息步伐之後，市場氣氛開始回暖，對屬於高負債嘅科企嚟講，無疑係一個利好訊號，起碼籌集資金容易咗，亦都刺激到市場對佢哋嘅信心。

至於主觀因素，好大程度係關乎行業發展趨勢。大家應該記得今年初，ChatGPT帶起嘅風潮有幾厲害，當呢個AI工具出現之後，每一間科企都爭相推出，而當時市場嘅反應係，科企又再出現新嘅增長點，所以估值提升，市場資金再度流入。呢個係熱錢效應，買憧憬買預期，往往就係出現喺呢啲時候。

投資者如果要捕捉投資機遇，就要多啲做功課喇。

（本欄逢周四刊登）