科創企業翻身 言之尚早

正值內地兩會召開，坊間唔少機構同分析師都預測內地今年嘅政策，對邊類行業有利；其中，國務院機構改革方案公布之後，唔少人都認為今年科技股即將迎嚟新升浪。

點解？原因有兩個，其一係將國家科技部進行改革，將會更集中創科發展；另一個係成立國家數據局，有望推動更多平台型企業嘅發展。

市場部阿明就走嚟問曉陽，ATM今年係咪會翻身？有無機會可以入定貨博炒上？

到底科技股或者科創股係咪可以反彈？現階段好難講。雖然，近期官方主旋律已經轉風向，從幾年前要加強監管平台企業、控制科創公司，到今日提出要支持民營企業、提升營商環境便利度等等，都明顯係對科創企業利好。

但如果話科創企業要重返幾年前嘅盈利水平同增長，恐怕就有啲困難。首先係經歷過去兩年大規模監管後，唔少平台同科企都已失去壟斷能力，而當年之所以賺錢，就係因為壟斷市場，令消費者無從選擇；其次，要觀察市場飽和度，部分平台企業過去兩年就係因為市場萎縮，或者市場需求下滑，而產生盈利下跌，並非一面倒係政策因素影響，所以政策放寬，對佢哋嘅提振作用有幾大，仲需要觀察。

相反，今次中央出手改革負責科技嘅部委，係針對外國制裁嘅反擊意味更濃；部分基礎科技企業，例如無上市嘅華為、鋰電池龍頭寧德，甚至部分芯片類相關嘅企業，將來可能會成為重點扶持對象，呢類企業更值得留意。

（本欄逢周四刊登）