藝人以外「我的志願」 鄭欣宜想做紅館帶位員

大家小時候曾以「我的志願」為題作文，不少人夢寐以求想當明星，不過藝人背後的努力未必為人所知。如能重新再選擇，鄭欣宜（欣宜）、余香凝（Jennifer）及陳嘉寶（Anjay）最想做甚麽職業呢？搞鬼的欣宜笑稱最想每天到紅館上班，背後原因相當搞笑。

今年六月連開三場紅館演唱會的鄭欣宜，原來曾幻想可以做紅館帶位員，她坦言是抱住粉絲追星的心態︰「我好單純咁諗呢份工真係唔錯，如果撲唔到飛，但又好想睇呢個騷，咁做帶位員就可以喺最佳位置，無遮無擋的視綫下欣賞成個騷囉！」除了紅館帶位員，欣宜更想過去戲院帶位︰「成日諗熄晒燈，我咪可以坐低睇戲囉，唔夠人仲可以幫手去小食部賣爆谷。」

欣宜指自己亦有靜態一面，所以也十分適合當圖書館管理員︰「本身鍾意睇書，喺圖書館工作應該都幾啱我，同我性格反差大？正好反映我雙子座嘅性格囉。」

余香凝 做陪月賺得多

去年誕下女兒的余香凝，一直堅持親自照顧女兒，她自問可做一個稱職的陪月︰「當然我都係生咗個女之後，先發現幾適合照顧BB。呢一年幾以嚟，對照顧BB同坐月媽媽的知識多咗，加上做陪月咁好搵，哈哈！放心！我絕對唔會係一個黑心陪月！」

Jennifer表示喜歡小朋友，是巨蟹座兼有耐性，而強項是講故事︰「我覺得自己係專業講故事專員，我可以一人分飾幾角，仲講得好生動，又會中間加插唱歌，個女都好鍾意。」

陳嘉寶 有野心做經理人

陳嘉寶自覺有做經理人或開公關公司的潛質，因為大學時修讀新聞系，清楚公關公司的運作。她說︰「我以前曾經幫一個本地品牌做公關，負責為活動出新聞稿，喺大學學到嘅嘢都用得着。」作為經理人，經常要為藝人做擋箭牌，能否駕馭得到？Anjay稱所以非常佩服其經理人Kim︰「我讀大學曾經學過危機管理，都好有用！睇下Kim肯唔肯畀啲藝人我去管理下啦，等我實戰下，哈哈！」

現已是三女之母的Anjay，笑言現階段可先任三名女兒的經理人︰「我依家幫佢哋安排每日行程，其實都熟習緊嘅。」

採訪︰Pauline