草蜢紅館騷海報玩剪影 蘇志威︰摒棄靚仔樣

草蜢將於下月26日起，舉行一連四場「RE︰GRASSHOPPER CONCERT草蜢演唱會2022」，門票今早起公開發售。三子的個唱海報昨日曝光，今次完全顛覆草蜢的傳統，採用黑色剪影的映像設計，要細心看才見到他們的樣子。設計總監朱祖兒表示一提「草蜢」，就會想到跳舞唱歌的畫面，便以剪影手法保留思考空間。蘇志威笑說︰「今次要摒棄我個靚仔樣…」蔡一傑強調︰「其實細心留意係見到少少，只係唔係咁清楚啫！」蔡一智續說︰「好有神秘感，見到少少，好似新娘頭紗，到開騷嗰日就會揭開畀大家驚喜。」

相隔五年再踏紅館，草蜢除了在個唱海報大玩驚喜外，也計劃開設期間限定店，設計不同紀念品外，又設置大型紙牌海報給歌迷影相留念。三子近來不時在IG公開跑步和健身的生活片，阿智笑說︰「呢幾年我哋無得出國，更加無去韓國，所以fit咗、靚仔咗，都係因為運動多咗。準備咁耐，終於可以上紅館騷畀大家睇『草蜢2.0版』！」