呻丁子高唔識撈常激嬲自己 楊千嬅最驚老公走樣

楊千嬅擔任王祖藍主持的《有個閨密叫祖藍》嘉賓，千嬅在節目中全程真情流露講完老公講奶奶，千嬅爆老公丁子高「唔識撈」經常批評她外，又大爆對方是「運動魔人」，但千嬅坦言最怕老公身材走樣！

千嬅在節目中大爆丁子高是「運動魔人」，即使上綜藝節目他也當「真‧比賽」拍攝︰「有次佢特登訓練咗三個月先去拍，我提咗佢十次『呢個係節目、你只係演員』，佢就話自己係運動員。」千嬅笑指自己沒有嫁錯人，祖藍讚丁子高身形fit，千嬅篤爆老公身形沒有大家想像中好︰「佢遮得好咋，話佢perfect figure（完美身形）又唔係。我又無要求佢，但最好唔好咁走樣啦！」

否認跟丁子高一見鍾情

千嬅愈講愈興奮，大數丁子高「唔識撈」，第一次約會便將她的所有缺點說出來，婚後依然會批評她，令千嬅好唔高興。千嬅強調與丁子高並非一見鍾情，只是相處後愈發覺深受對方影響，並指現時移居上海全因老公是上海人。祖藍追問下，千嬅直認有行奶奶政策，即分享與奶奶打麻將的趣事︰「打牌我只係識識哋，初初同奶奶打我好驚㗎，奶奶好認真，真係驚過輸㗎！」

撰文︰倪小珊

美術︰梁政敏