曾參加《全民造星III》的38歲創作歌手黃劍文（Kimman），在破碎家庭成長，26歲時經歷母親燒炭自殺身亡，令他跌進人生谷底，他更一時想不開，差點隨亡母做傻事，了結自己生命；幸好他想到湊大他的外公、外婆才打消念頭。過着漂浮人生的Kimman，靠信仰走出陰霾，也學懂如何去愛。
黃劍文表演經驗豐富，曾在世界各地busking獻唱的他，16年獲邀為ViuTV唱《瑪嘉烈與大衛系列綠豆》主題曲《我們的》及插曲《尋找消失的過去》而為人熟悉，前年他參加《全民造星III》更打入十強。由07年參加台灣《超級偶像》起，Kimman多年來參加《超級巨聲》、《快樂男聲》、《中國好聲音》及《星光大道》等大大小小的歌唱比賽，全因想賺錢養家。「當時（比賽）最大嘅推動力，係覺得打份工唔能夠照顧到屋企人。我以前做倉務員，屋企當時係幾窮，於是諗住去台灣試下做音樂，所以參加唱歌比賽，等人認識我。」
想起家人放棄做傻事
Kimman家庭背景複雜，黃媽媽十多歲時誕下Kimman，後來帶着他改嫁。「我無見過親生阿爸，阿媽再婚後我有個後父。細個最難過係對住後父嘅親戚時，我唔可以叫我阿媽做阿媽，要叫佢做阿姨，呢樣嘢幾影響我嘅成長。」他坦言一度痛恨後父：「我曾經憎佢憎到想殺咗佢，但我14歲時接觸咗宗教，憑住信仰，由憎恨變做學習點樣去愛。」可惜，黃媽媽後來自殺身亡，令Kimman大受打擊。「阿媽喺我26歲時離開，當日佢係燒炭（自殺），我喺醫院張床聞到好大陣燒炭味，之後三日三夜我喊到瞓唔到覺。我承受唔到媽媽離開嘅痛苦，對世上所有嘢都唔留戀，第四日去朋友屋企住，嗰度係26樓嘅單位，我一起身就行出露台，一望落去，就好想跳落去。」
幸好，Kimman一念之間想到家人，令他放下自殺念頭。他眼紅紅說︰「如果我行多一步就跳咗落去，就會好似我阿媽一樣，好孤單、好孤獨。其實死係好容易，但我想跳時突然諗起屋企人，諗起湊大我嘅公公婆婆，如果佢哋個女已經自殺離開，湊大嘅孫又咁樣離開，佢哋會點？我覺得自己好自私。當時我又諗到細佬妹，如果我咁做，佢哋會唔會跟住做？於是我決定留番低，之後做嘅第一件事，就係叫神救我。」最終他憑信仰走出陰霾，踏上他的音樂之路。
害怕孕育下一代
Kimman的新歌叫《人間飄浮》，似乎用來形容他的人生很貼切。「我嘅人生係飄浮，媽媽件事令我連屋企都唔敢返，之後去咗台灣比賽，然後再去澳洲working holiday。當時諗住放棄唱歌，但見到嗰邊街頭音樂文化好強烈，我就喺嗰邊唱歌；跟住嗰四年不斷漂浮遊走歐洲、亞洲唔同地方街頭獻唱，反而令我覺得唱歌係我嘅真正使命，因為喺街上唱歌聽到好多聲音，好多人會講『You make my day』，甚至有人喊住多謝我、走嚟攬我，原來我嘅音樂power咁厲害。」
回想過去的家庭經歷，他坦言害怕生小朋友，「我怕畀唔到幸福下一代，但如果真係有（小朋友），我都會盡最大努力，去畀最好嘅嘢佢哋。」他亦慶幸當日無做傻事，「如果我26歲嗰年真係死咗，我就唔可以同大家講『愛真係要講出口』。如果有唔開心，一定要同屋企人講，雖然有時會驚講咗仲大壓力，但真係唔好收埋。我好感恩曾經有機會，同阿媽講句『我愛你，多謝你咁多年嚟辛苦養我哋』。」他又語重深長說︰「記得要擁抱，我30歲嗰年第一次擁抱婆婆，佢同我講句『乖孫』，令我好感動。我真係失去過，所以更加學會珍惜。」
【一按睇片】
化粧、髮型︰小籠包
服裝︰Rule_Crossing Man
場地︰Liffee Coffee & Treats（灣仔堅彌地街1A號地下A舖）
撰文︰梁榮達
美術︰梁政敏
攝影︰馮凱宜、何家賢