與家人重聚爆喊 炎明熹爆《聲生不息》交錯胞妹相

炎明熹（Gigi）在內地綜藝節目《聲生不息》表現亮眼，不但登上微博熱搜冠軍，微博粉絲人數更持續上升。日前Gigi接受無綫娛樂新聞台專訪時，坦言沒有想過回響這麼大︰「非常多謝大家，我會繼續努力。啲數字係咁升，真係有啲『驚變（嚇親）』我！」

相隔兩年，Gigi終有機會與家人重聚，她大感開心與感動︰「第一日接媽咪放工，媽咪喺度喊搞到我都喊，爸爸媽媽同我講咗好多嘢，仲話我係佢哋嘅驕傲！」提到日前直播時，Gigi帶八歲妹妹驚喜亮相，她自覺與妹妹長得十分相像，更大爆自己傻傻分不清自己與妹妹，「《聲生不息》製作組要我細個嘅相，點知我搞錯咗，畀咗細妹張相佢哋！」認真搞笑。