廖文哲｜廖啟智長子廖文哲首開腔談性取向傳聞 曾自爆「想做女人」同性戀被誣衊崩潰 難忘亡母陳敏兒最後叮嚀：佢好愛我

已故資深演員廖啟智太太陳敏兒於6月12日因病離世，終年65歲。其子廖文哲、廖文信透過陳敏兒的社交平台發布訃聞。近日，長子廖文哲罕有接受新城電台節目《盡訴心中情》的訪問，首度開腔回應性取向傳聞，席間亦憶述與亡母相處點滴，直言「佢好愛我」。

同場加映：

{{hket:ul-video id="12655"}}{{/hket:ul-video}}

廖文哲首開腔談性取向傳聞

廖啟智和太太陳敏兒的大仔廖文哲日前接受梁繼璋在新城電台主持的《盡訴心中情》訪問，首次公開回應當年外界對其性取向的種種揣測。事緣2013年，廖文哲曾在個人社交平台上載多張化妝及女性化打扮的照片，並發文自稱「想做女人」及透露同性戀傾向，隨即引發輿論關注。當時廖啟智與陳敏兒曾對外澄清，指兒子的言論僅屬朋友間的玩笑，並非真實的性取向宣告。

回顧事件，廖文哲坦言當下心情極度低落，對於無端遭受指控與誣衊感到茫然與委屈：「嗰陣當然係好down，唔知點解無端端俾人誣衊，但係呢件事令到我放開啲，知嘅人就會知，關心我、認識我嘅人就知我係乜嘢人。」

回憶與父母相處點滴

談及當年與父母的相處點滴，他坦言，爸爸媽媽的教育比較規矩，「如果話惡一啲，爸爸就比較嚴肅同嚴厲，佢哋嘅教育方式係好講規舉，做錯嘢會打一下手板。」但他補充，廖啟智經常抽空陪伴自己：「智叔有時工作就會一段時間唔喺屋企，但佢有時會花時間同我去踩單車、去沙灘。雖然佢個樣好嚴厲，但其實佢好鐵漢柔情。」

被問到會否因父母名氣過大而感到壓力，廖文哲表示：「細個係有壓力，個個都知爸爸媽媽個名，反而唔知我係邊個，到大個咗搵到多啲自己，慢慢習慣咗。」至於沒有跟隨父母步伐投身演藝界，而是選擇了音樂之路，他指父母態度相當開明：「其實佢哋好free咁俾我行自己嘅路，可能有時遇到一啲挫折或唔好嘅事，佢哋都會扶我一把，佢哋會提醒我，但唔會反對任何事，佢哋思想好開放。」

談及父母為人，廖文哲形容：「敏兒姐佢真係好有愛心，因為我嘅價值觀、我嘅生活模式，同佢都有唔同嘅位，我哋會慢慢溝通、慢慢協調；智叔就比較內歛，佢比較完美主義者，好有規矩，但我就比較free㗎嘛，但有時佢都會願意...好似佢本身唔食煙，但係佢有時食完飯都會陪我食煙傾偈，就係鐵漢柔情嗰個位令我好感動。我覺得我嘅家庭係好正，佢哋嘅愛係好直接touch到我。」

面對母親離世：媽媽一直慢慢同我哋道別

廖啟智在2020年底確診胃癌，未夠半年病逝，享年67歲。其幼子廖文諾在5歲時患上血癌，直至2006年4月亦安詳離世。如今只餘下大仔廖文哲和次子廖文信兩兄弟，外界都擔心二人的身心狀況。

而廖文哲在今次訪問中情緒平穩，他坦言：「爸爸走咗之後，敏兒姐教咗我同細佬點樣去疏導，今次面對呢件事，當然壓力大，亦都好傷心，我都掛住佢，但係佢一直慢慢同我哋道別，見晒所有想見嘅人，佢知道某一日會嚟，呢個媽媽都幾特別。」

至於弟弟廖文信較早前則在IG上發文，感謝外界的關心與支持，並表示：「我同屋企人一切安好！大家唔使擔心」。

談新歌召喚亡母：佢好愛我

作為「星二代」的廖文哲早年遠赴澳洲修讀音樂製作，對電子音樂情有獨鍾，並組建了名為「Taste of Blue」的樂隊，活躍於獨立音樂圈。在母親陳敏兒離世後，一直保持沉默的他，近日透過樂隊官方社交帳號轉發個人動態，首度公開談及此事：

我想講，呢首歌，係@taste_of_blue（即係我本人），喺我自己嘅廠牌 @prion.era release嘅最新一首歌，關於召喚死去的母親。出完之後，就真係面對母親的離世。好神奇。

廖文哲在節目中進一步透露，該首歌講述一個神話故事，描述一名女巫離世後，其兒子經歷重重波折，最終成功召喚母親，而母親唸出咒語，賦予他面對困境的力量。他直言，完成這首歌一個月後，他便迎來母親的離世：「我相信將來如果再遇到挫折，佢都會用某種方式來提點我，因為佢好愛我。」