直認與《造星IV》Ash逛超市 MC張天賦︰唔清楚佢婚姻關係

MC張天賦昨日出席《香港金曲頒獎典禮2021/2022》記者會，提到最近被拍到與《全民造星IV》參賽者Ash（鍾卓穎）於平安夜一同逛超市，惟Ash當時仍未宣布離婚，MC解釋與Ash只是普通的工作合作夥伴，私下沒有聯絡，「因為嗰日無嘢做，所以就一齊去行超市。（當日平安夜，唔擔心外界會聯想？）我無諗到太多，其實嗰日都係即興搵朋友，雖然去超市得兩個人，但之後仲有好多人一齊去party。」

對於Ash於大時大節不跟另一半度過，MC會否覺得奇怪？他回應︰「我哋未熟到咁，所以無過問。（有無問過佢嘅婚姻關係？）唔清楚。」至於兩人日後的發展空間？MC表示︰「一齊拍MV嘅時候，佢都有請教過我公司上嘅問題；我都有睇佢參加比賽嘅片段，覺得佢唱歌幾好。至於拍拖我就無諗過，如果我拍拖會公布，但目前仲係單身。」