牙齒不齊感自卑 周秀娜：成日唔敢露齒笑

周秀娜（娜姐）及李靜儀（Heidi）昨日出席牙齒護理產品活動，貴為女神級的娜姐，原來入行前曾因牙齒不整齊而自卑，更試過因此失掉工作機會，令她決心箍牙變靚。

周秀娜及李靜儀昨日以純白打扮現身，現時擁有一排靚牙的娜姐，坦言曾因牙齒不夠整齊而自卑，「以前啲牙唔齊，所以成日唔敢露齒笑，好羨慕牙齒生得整齊潔白嘅人。我以前做model嗰陣，因為啲牙生得唔靚，所以關於牙齒嘅廣告都無我份。我好想笑起嚟有『叮』一聲嘅效果，所以用咗年幾兩年時間箍牙，但係嗰時成日食嘢都唔記得除牙箍，變得好尷尬。」問她揀男友時會否特別留意對方的牙齒？她表示外觀及儀容整潔相當重要，「依家好多男仔都注重外觀，如果對方有棚靚牙，的確印象好啲。」

李靜儀被誤會整容

同場的Heidi讀書時曾經箍牙變「鋼牙妹」，但長大後因智慧齒生歪了，影響其他牙齒，所以被迫拔掉八隻牙，然後第二度箍牙。她笑說：「箍牙最大得益係會瘦咗，但好多人都唔信箍牙可以改變面形，仲會誤會係整容。」另外，Heidi有份參演的電影《假冒女團》現正上映，她透露已入戲院看過三次，本周末亦會出席謝票及簽名活動，「好開心咁多人欣賞，暫時未知會唔會開續集，如果原班人馬拍攝其他題材都唔錯。」

採訪：Pauline

攝影：林良明

美術：梁政敏