預告棟篤笑大講2級半踩界話題 林盛斌︰希望50歲前紅館開Talk騷

42歲的林盛斌（阿Bob）將在下月18日假九展舉行棟篤笑《The Bobfather 2021》，已是四孩之父的阿Bob，直言會繼續大講二級半踩界話題，務求在逆境下放笑彈。他更躊躇滿志，期望步黃子華及林海峰後塵，踏上紅館開騷︰「如果50歲前可以喺紅館開talk騷，咁就正喇！」果然目標遠大。

回帶2015年，阿Bob在灣仔伊館舉行兩場棟篤笑《Bob's Up》，大談人生高低起伏。今次趁本地新冠肺炎疫情緩和再開騷，門票昨日公開發售。相隔六年再開棟篤笑，阿Bob透露兩次開騷的日子碰巧都是12月18日，感到冥冥中自有主宰。他感觸道︰「當年大家唔使戴口罩，六年間社會環境好大轉變，上年大家都經歷好多，今次喺年尾做騷，係希望畀大家唞唞氣，去迎接2022年。」由於12月是表演場地的旺季，所以今次阿Bob只能開一場，但他亦堅決「去馬」。「我喺呢幾個月都閉關度稿，準備好多金句，依家完成80%，相信到時大家笑足兩個幾鐘。」

兒童不宜拒子女捧場

阿Bob不諱言開騷有得有失︰「我外面接job接到今年中已經暫停，因為要閉關準備，推咗好多工作，嚟緊本來有個商界大型頒獎禮，因為喺開騷前一星期舉行，所以我都做唔到。」是否為開騷損失六位數字收入？他未有正面回應，僅稱為做好棟篤笑會義無反顧︰「始終今次係自己嘅大project，日後通關我可以去其他城市繼續開騷。」回想六年前完成《Bob's Up》後，他曾到馬來西亞、澳門等地開騷，如非去年疫情影響，阿Bob也會踏足美國、加拿大及澳洲等地的華人社區開騷，但無奈全部取消。他坦言︰「希望完成《The Bobfather 2021》後全球疫情好啲，通關之後可以去其他地方開騷。」

談及今次棟篤笑的內容，他承認一如過往兒童不宜，所以無意讓四個仔女入場做觀眾。他笑道︰「朋友都問我可唔可以帶小朋友捧場，我話個騷啲金句笑料都有講兩性關係、粗口諧音，所以都叫二級半，唔算合家歡。有啲gag太細個又未必明，我都唔畀13歲嘅大女入場，起碼夠16歲嘅年輕人先睇得。」

讚太太變KOL吸金力強

曾踏上灣仔伊館小試牛刀，阿Bob今次轉戰場地較大的九展Stall Hall。他堅持永不停步，早已瞄準未來進軍更大場館︰「我屋企有塊板，上面寫晒人生目標，之前許冠文、黃子華同林海峰都曾經喺紅館搞萬人棟篤笑，所以我都喺塊板寫咗『紅館』，希望八年內自己踏入50歲前，企到上去開個人talk騷。」

現時阿Bob身兼多職，包括藝人、司儀、網店及娛樂公司老闆等，Bob嫂黃乙頤也「妻憑夫貴」，知名度與日俱增，擁有玄學家、塔羅師及親子KOL等多個身份。阿Bob笑言見證太太「上位」︰「12年前我啱啱做爸爸，佢陪我同囡囡一齊做訪問。經過咁多年，依家記者會直接搵佢，有次我喺屋企問佢點解着得咁靚，原來佢自己去做訪問。」的確，阿Bob前晚夫妻檔開FB直播推廣健康產品，絕對是夫妻同心，齊齊掘金。

撰文︰Steven

美術︰顏玉玲

攝影︰林良明