承認計劃築愛巢 馬國明首選港島區避黃心穎

馬國明（馬明）和湯洛雯（靚湯）去年六月公開認愛至今，已多次傳出婚訊，早前本報更披露兩口子雙雙搬進將軍澳某樓盤，疑似築新婚愛巢，更與舊愛黃心穎居於同一屋苑。馬明昨日出席活動時，僅承認正物色愛巢，但坦言首選港島區，而非公司所在的將軍澳區，因為希望有放工回家的感覺。

馬國明昨日出席劇集《星空下的仁醫》宣傳活動，對於有傳明年娶女友湯洛雯，馬明帶笑回應︰「無啦，一直都要開工，嚟緊又要開新劇…我成日都話如果真係結，一定會自己講，好奇怪我一有劇出就會話我結婚，咁結得幾多次？」

早前本報披露馬明將在將軍澳築愛巢，更與舊愛黃心穎做鄰居，馬明即表示︰「我唔知，總之我住邊都會自己講。其實我想買多層樓，依家睇緊，都係為將來結婚。（物色緊將軍澳樓盤？）我反而唔想咁近公司，想有返屋企嘅感覺。其實本身比較鍾意住港島區，將來交通方便咗，就算喺港島返公司都好方便。」問馬明買樓會否加靚湯名字？他解釋︰「我哋都用咗首置，可能會用屋企人個名買，如果唔係印花稅會好高，啲錢留番裝修仲好。」

張寶兒演技終獲老公認可

另外，同場的伍樂怡（Kelly）指今次是自己首部有較重戲份的劇集︰「仲有進步空間嘅，朋友都同我講算唔差。」而拍劇中途結婚的張寶兒就笑言︰「結婚前一日仲拍緊喊戲，結婚後再返嚟補拍都係喊戲。」提到寶兒早前被老公袁偉豪批評演技，她解釋道︰「我喺拍攝後期適應咗角色，已經漸入佳境，佢無再批評。」

攝影︰林良明

美術︰梁政敏

採訪︰Pauline