花痴式採訪後首現身 陳約臨眼濕濕道歉

《2020東京奧運會》已圓滿結束，無綫前晚於將軍澳電視城舉行慶功宴，高層曾志偉及奧運主持陳約臨（Kelly）、陳庭欣、余德丞及丁子朗等均有出席。Kelly於東奧採訪「193劍神」張家朗奪金感受時，「花痴式」表現被批不專業；Kelly在事件後首度現身並連番道歉，訪問期間她更一度眼泛淚光。

慶功宴上，陳約臨明顯有備而來，甫接受訪問就連番道歉，她說︰「想為自己唔成熟同唔專業嘅行為講聲對唔住，知道成個團隊都好辛苦，（現時心情如何？）其實我都係啱啱返香港，啱啱完成隔離，隔離期間都有為發生嘅事反省，希望以後嘅工作會有進步，自己亦會繼續努力。」

問到可有親自向張家朗道歉？Kelly表示已私下向對方致歉︰「我有私下同佢講聲『唔好意思』，我嘅行為影響到佢嘅情緒同感受，佢都話明白，我好多謝佢原諒。之後佢會參加全運會，希望佢可以再創佳績。」

感激張家朗原諒

Kelly在採訪失態後曾堅稱自己無做錯，惟其後卻刪除社交網上與賽事有關的帖文，又寫親筆道歉信，問到是否受到公司的壓力？Kelly解釋︰「做完live兩分鐘就有記者搵我，嗰時情緒仲好高漲，我控制唔到情緒同反應，喺度再次講聲唔好意思…公司有第一時間聯絡我，特別感謝公司嘅關心、開解同鼓勵。」Kelly眼濕濕續指︰「本來呢個係好好表現自己嘅機會，但最後自己好唔成熟，真係唔好意思。」

Kelly指事件發生後不覺工作被刪減，她又拭淚多謝公司的支持，明白今次事件影響到身邊很多人，幸得到同事的包容，讓自己成長；Kelly亦表示會一一接受大家的留言和批評，並更珍惜往後的工作機會。

採訪︰Pauline

美術︰梁政敏