獲汪明荃支持做女一 陳自瑤感動：望合作拍劇

陳自瑤（YoYo）早前在《好聲好戲》總決賽擊敗馮盈盈及張振朗，成功奪總冠軍。前晚YoYo與一眾參賽藝員出席謝師宴，答謝汪明荃、劉江等評判、導師及配音員。提到阿姐公開要求無綫開劇給YoYo做主角，YoYo特別多謝阿姐為她及其他演員發聲，令她深受感動。

陳自瑤、汪明荃、何廣沛及楊潮凱等前晚出席《好聲好戲》謝師宴，YoYo手持冠軍獎座，坦言沒想到參加節目會有意外收獲：「真係無諗過攞獎，以前未試過做配音員，比賽旨在改善聲綫，挑戰自己，等將來演戲可以做好啲。其實過程真係幾艱辛，短期內都唔好再試。」提到參賽藝員一起為本周日播出的西片《侏羅紀世界》配音作為畢業作品，聲演女主角的YoYo說：「心情好興奮又緊張，劇本有成三吋厚，有啲擔心自己把聲難聽，最重要係夾嘴形，始終講英文同廣東話唔同，當日配咗10幾個鐘，真係坐到pat pat痛。」

女兒都讚叻

提到主席評判汪阿姐公開發聲，呼籲公司拍劇多用不同演員，又提議開劇讓YoYo做女主角，YoYo感動說：「好多謝阿姐，佢一向好肯幫後輩發聲，無論係咪實現得到，我已經好感動，如果有機會同阿姐合作拍劇就更加好。」她又感謝比賽期間收到網民的留言鼓勵，令她感動到喊。問到女兒可有讚她得獎？她笑說：「個女有讚我叻，我之前喺屋企練習，佢一路都睇住，所以佢睇節目都特別有共鳴。」

採訪：Pauline

攝影：林良明

美術：梁政敏