被爆曾出軌 疑IG撩女「尋開心」 呂爵安︰唔希望影響任何人

人氣男團MIRROR成員呂爵安（Edan）近日被爆感情糾紛，其舊愛Stephanie暗示Edan曾「派帽」（出軌），網上更流出疑似Edan在IG與女性的露骨對話短訊截圖，頓時花生價格急升。Edan昨午在IG明言「不應該澄清或回應」，似乎欲低調處理為事件降溫！

24歲的Edan與Stephanie是大學同學兼拖友，二人於前年和平分手，當時女方亦有在IG出發文感謝舊愛，雙方總算再見亦是朋友。不過，近日Stephanie在IG公布答應現任男友求婚，卻慘被不知名人士贈興，刻意在留言tag了Edan的IG帳戶，更有人指Edan會戥她開心，但此舉卻令Stephanie嬲爆，她更留言自揭曾慘被派帽，似有所暗示。她又發限時動態，披露有花生友寸她借舊愛上位，可謂有苦自己知。

舊愛開腔冀是非完結

其後，網上討論區竟爆出疑似Edan在IG撩女的對話截圖，內容露骨；昨日更有聲稱與Edan同在港大讀書的網民，指Edan在學期間一向是「渣男」，經常背女友出軌，令事件持續發酵。昨午Edan在IG發布限時動態主動回應︰「知道有關自己嘅事情被討論中，私人同過去嘅感情事，我認為我唔應該作出任何澄清或回應，因為我唔希望會影響任何人。希望大家畀多啲空間事件中嘅人，停止對佢（or佢哋）嘅騷擾。我自己亦會繼續專注喺我嘅工作上。」Stephanie及後極速轉發Edan回應，她寫道︰「要講嘅佢講晒，其實各自開始咗新生活，唔希望再有人專登嚟提起，未來見一個del（刪除）一個。」

肥仔@ERROR回復單身

事實上，Edan在MIRROR中甚有人氣，森美自爆其15歲女兒是「爵屎」（Edan粉絲），又大讚對方是「女婿安」；曾與Edan合作的阮小儀，更自封是Edan「正印」，早前更齊齊過「520」，足見Edan魅力非凡。另一方面，組合ERROR成員肥仔（梁業）的初戀女友阿芬，前日在FB宣布二人已分手，正式結束八年情。阿芬寫道︰「對不起，我已和Leung Yip（肥仔）分開了，最近收到好多大家對我哋嘅祝福，我們將會一一轉化成鼓勵。因了解而分開其實也算是在感情路上最好的結果，我倆彼此也會在心裏互相好好祝福。」她最後呼籲各界繼續支持ERROR，果然有情有義。肥仔與阿芬過往一度分開後復合，今次戀情再度告終，實在令人惋惜。

撰文︰Steven

美術︰梁政敏