鄭中基（Ronald）昨日49歲生日，他在前晚生日前夕突發宣布將於下月24、25日在中環海濱活動空間舉行個唱，更仿效外國設車輛套票，樂迷可駕車入場睇騷，絕對是本地樂壇破天荒的一次。Ronald在IG說︰「大件事又突然，我自己都好期待！」絕對是疫情下的好消息。
鄭中基前晚宣布下月到「核心嘅外圍」中環海濱活動空間開兩場「Drive In Ultra-WEE are Ronald Cheng」演唱會，今次最破格並非戶外開騷，而是全港首個自駕入場式演唱會，樂迷可駕車入場，於座駕內欣賞Ronald的演出。主辦單位安排的車輛套票有過百張，票價為6,000港元，每輛私家車限定載四人，車輛高度不可超過1.5米，以免阻礙觀眾視綫。至於約有7,000座位的普通觀眾席，價錢分別為1,080港元及880港元，門票後日開始優先網上訂購。
JW勢必捧場
壽星仔Ronald前晚在社交網分享個唱宣傳片兼留言︰「明嘅明嘅，我都知又大件事又突然，係會一時間消化唔到嘅，之後我會再同大家講解下，我自己都好期待。」他透露會在其YouTube頻道「機動電視台RTV」交代詳情。Ronald老友方力申在發帖下留言送上祝福，王灝兒（JW）亦笑言必定會捧場。很多網友期待Ronald首個大型戶外騷；亦有樂迷大呻其座駕高度超過1.5米，未能享用車輛套票。
其實Ronald今年一月現身活動時，已經為這次個唱透露玄機：「我有個戶外演唱會計劃，觀眾可以坐喺車裏面睇騷，類似構思喺外國已經有好多，就算睇電影都會揸車喺車入面睇。」他當時更表示有意在今年聖誕節假台北小巨蛋開騷，未知他屆時能否如願轉戰寶島。
撰文︰Steven
美術︰梁政敏