抗拒咀蔡思貝姜麗文 張振朗：寧願拍100場打戲

張振朗、蔡思貝及已約滿無綫的雪妮等，昨日宣傳新劇《踩過界II》。張振朗在劇中艷福無邊，連環咀嘴多位女角，但他原來十分怕醜，竟非常抗拒親熱戲，認為拍動作戲更加享受。

在《踩過界II》中有多條感情綫的張振朗，昨日在台上特地多謝監製林志華。提到他在劇中幾乎錫勻幾位主要女角，他笑說：「我同張曦雯有咀嘴，姜麗文就為咗救我而同我做人工呼吸，反而簡淑兒就無。」身旁的蔡思貝聞言說：「振朗同思貝無咀，同癲姐（思貝劇中角色）就有，因為爭棚哨牙爭好遠！」

思貝笑指振朗其實是怕醜仔：「我哋拍劇有少少身體接觸，佢都面紅，佢拍之前都會問咗我先，好有紳士風度，同佢拍親熱戲好放心。」振朗亦說：「我同思貝早有默契，所以放心啲，但我寧願拍100場打戲，都唔想拍一場親熱戲。」另外，思貝早前於《#後生仔傾吓偈》大談與德國舊愛的異地戀，她透露與德國男友分開後仍有聯絡。不過她坦言現時工作行先，暫不會為另一半放棄事業。

75歲雪妮聽覺退化

雪妮在丈夫唐佳陪同下現身宣傳，她獲一眾演員送上心意卡和鮮花，令她一時感動落淚。她自言眼淺易喊：「頭先喺台上好亂，始終我聽覺唔好，兩邊耳仔都要戴耳機（助聽器）。」她坦言年紀大、記性差，為健康着想而息影，現時一有空便游水、飲茶、買餸煮飯，生活悠閒。她透露自己仍有《大步走》、《食腦喪B》及《唐人街》三部劇未出街，有需要一定出席宣傳。

採訪︰Pauline

編輯：李潔盈

美術：梁政敏