踩3吋高跟鞋亮相 陳凱琳下周揭曉第二胎性別

陳凱琳（Grace）與鄭嘉穎育有一歲多兒子鄭承悅（Rafael），上月Grace宣布再懷孕，成功三年抱兩。Grace昨日到海洋公園出席活動，腹大便便的她仍穿三吋高跟鞋現身，但步履輕盈，對於今胎是男還是女？Grace大賣關子︰「下星期搞Baby shower先公布。」

陳凱琳昨日穿吊帶貼身裙亮相，肚凸凸的她手腳依然纖幼。問到懷孕幾多個月？Grace說︰「孕期已經過咗一半有多，總之好穩定、健康，呢胎比上一胎陀得舒服，食得瞓得，肥咗十幾磅。（第二胎仔定女？）下星期公布，我哋會約朋友舉行Baby shower，到時切開蛋糕就知道BB性別。」她自言第一胎開刀生，但今胎仍未決定開刀還是順產︰「始終我細粒，安全起見會交畀醫生決定。」

Grace指大仔Rafael年紀尚小，尚未知道會有弟妹︰「囝囝有時會行埋嚟篤一篤我個肚就走咗去。（怕唔怕大仔呷弟妹醋？）我聽啲父母講，要代表快出世嘅弟妹送份禮物畀哥哥，咁我哋都準備咗，會送本書畀佢，因為佢好鍾意睇書，成日叫我讀書畀佢聽，希望培養佢好奇嘅一面。」提到日前Grace生日，她笑說︰「簡單食餐飯，老公送咗份愛心禮物畀我，出年30大壽先大搞，佢話人生得一次30歲、40歲。」

否認鄭嘉穎代還劇債

另外，有傳Grace隨鄭嘉穎離巢無綫往外闖，所以嘉穎返娘家拍攝新劇《兒童醫院》代她還劇債，但Grace否認︰「當然唔係，大家有商有量，嘉穎返去同好友馬國明拍劇都好開心。」她強調跟無綫仍有合約在身，但暫時以照顧家庭為重，未有時間復出拍劇。

撰文︰倪小珊

編輯︰李潔盈

美術︰梁政敏

攝影︰林良明