方皓玟約旦探訪受歡迎 吳業坤遭小難民孤立

吳業坤、方皓玟昨日以「饑饉大使」身份，到商台分享早前「約旦之旅」探訪敘利亞難民的感受。已為人母的方皓玟深受小朋友歡迎，同行的坤哥就慘遭「食檸檬」，相當陰功！

方皓玟表示到約旦探訪五天獲益良多，她稱︰「我哋幫手整餐包畀小朋友做lunch，有青瓜同芝士批。我對當地嘅廚房印象最深刻，衞生環境好，每天都為兒童難民提供有營養食物。」吳業坤就大爆方皓玟極受小朋友歡迎，「我哋同難民接觸，可能大家都聞到佢身體散發出嚟嘅母愛，小朋友全部衝晒去攬住佢，搞到我畀人孤立，得一個小朋友理會我。」

坤哥又笑稱，好幾次主動同小朋友傾偈都失敗，他試過學阿拉伯文跟大家打招呼，但竟然大家都聽到呆了，不過他們都很有禮貌，大家會握手，坤哥還帶了結他與小朋友一齊唱歌，他領悟到︰「原來快樂其實好簡單。」

方皓玟坦言是首次離開囝囝Luca五天，她笑言︰「老公拍片畀我睇，見到佢玩得非常高興，絕對無覺得缺少啲咩，我返到屋企，佢呆咗咁望住我。（好掛住囝囝？）都OK，因為一個人要去體驗人哋嘅痛苦，才會有反省機會，發現原來自己好幸福！」

鄧小巧沙漠換衫

此外，鄧小巧昨日到商台宣傳她的全新EP《No Coincidence》，碟內有三個不同造型，其中一個在台南一片沙漠取景，她穿上羽絨影相，辛苦得連內外衣物都濕透。她自爆當地沒有廁所更衣，要靠化粧師和髮型師拿着反光板遮住她，「我入面着背心，而且嗰度好遠唔多遊客，所以唔怕被人偷窺。」

撰文︰Pauline

攝影︰林良明

編輯：陳禮恒

美術：梁政敏