田蕊妮︰女人40 一樣精采

今晚首播的真人騷《女人四十》，由田蕊妮以第一身角度出發，與觀眾剖析女人40歲時面對的問題，內容圍繞愛情、婚姻、生育和兩性等方面，阿田更邀請了吳業坤擔任其一日情人，嘗試體驗姊弟戀的滋味。阿田直指︰「現代女性有自己嘅事業，追求愛情嘅時間表都唔同，到咗40歲時搵嘅伴侶未必會大過自己，所以想體驗下同一個細過自己嘅人拍拖喺點。」

問到節目中最感動的場面？阿田直呼︰「我份人好眼淺，一聽到結婚誓詞我就會喊，因為入面提到無論貧窮或富貴、健康或疾病，呢個喺好神聖、好莊嚴嘅承諾，每次我去到人哋婚禮一聽到段誓詞，我啲眼淚就會忍唔住流出嚟。」

阿田更透露真人騷中會訪問卓韻芝和素人，大談女人結婚的死綫，她坦言︰「雖然社會進步咗，但一啲傳統觀念依然好影響女性嘅睇法，譬如女性喺咪要40歲前結婚呢？」阿田直言，的確有人為了趕死綫而結婚。

撰文︰陳麗娜