惠英紅自認半個富豪

早前憑《血觀音》勇奪台灣金馬獎影后的惠英紅，返港後幾乎每日都應好友邀請食飯慶祝。適逢明日冬至，小紅姐前晚在銅鑼灣筵開八席，宴請圈中好友及傳媒齊齊做冬，場面熱鬧。

惠英紅奪獎連連，導演羅耀輝、陳果、英皇高層利雅博及跟小紅姐相識多年的文雪兒都有到賀。小紅姐透露鍾慧冰及林建明本來都想出席，但兩人身體抱恙，只好下次再聚舊。

小紅姐表示剛拍完新片，聖誕節終於可以休息。問她會否出外度假？她坦言對旅行興趣不大，反而會趁佳節相約三五知己打牌，更自爆花名「魚腩紅」。她笑謂︰「所有人都鍾意同我打牌，我打十次輸足九次半，不過我哋打得好細，上落都係幾千蚊，好少輸過萬。其實聽人講打牌可以幫助腦筋靈活，依家開始記性唔好，好驚有遺傳（其母生前患有腦退化症），不過我唔敢check呀！」

擇偶不介意離婚男

目前仍是單身的小紅姐，直認開始恨嫁，她笑說︰「大家誤會我要求高，又或者收埋咗一個冇話畀人知。唔使有錢㗎，我已經係半個富豪啦。」她坦言最緊要對方心地好，不一定要靚仔，但一定要年紀比她大，就算離過婚、喪偶都無所謂，明白到這個年紀的人都會有過去，並笑言︰「好彩個妹仲未嫁，大家有個伴，佢嫁埋我就唔知點算好。」

撰文︰Pauline

編輯：陳禮恒

美術：梁政敏