終於有臉見親家

想問下各位為人父母嘅讀者，仲記唔記得當屋企人知道你或你另一半有咗嘅時候，第一個反應係點嘅呢？係開心吖？喜極而泣？抑或做出其他更難忘嘅舉動？

Audrey嘅雙親一知道我有咗，當然係好高興啦，不過我最深刻嘅唔係佢哋嘅祝福同笑容，而係我爸爸不經意流露嘅一句︰「終於有臉見親家啦！」

聽到呢度，你係咪都覺得O晒嘴呢？老實講，我一直對呢句話耿耿於懷、甚至覺得荒謬至極，仲有啲嬲爹哋點解會有咁嘅想法。

其實，我心底裏係知道答案，因為佢覺得老公好錫我，老爺奶奶亦對我好好，思想傳統嘅佢認為要報答呢份恩惠，自己個女好應該盡妻子嘅義務，為夫家傳宗接代；可惜女兒結婚幾年並無所出，令佢自覺顏面無存，所以過往親家約佢飲茶，都覺得唔好意思，生怕提及抱孫話題，覺得有負於對方。

我一直覺得生兒育女，最緊要兩公婆有共識，唔使理外人點諗；我亦好努力向雙親傳遞呢個信息，並且向佢哋透露，我同老公喺呢方面自有計劃，叫佢哋唔使擔心。可惜，上述種種都未能釋除佢根深蒂固嘅思慮；而且結婚愈耐，佢嘅「催生」攻勢亦變本加厲，每次見面總問我有無好消息，真係買佢怕，搞到我有時都唔想返娘家食飯。

幸好呢個局面，喺我堅係有咗之後得到改善，如果唔係，真係唔知點收科。

（本欄逢周一、四刊登）