台慶講錯四字成語 陳凱琳自嘲：終於有金句

陳凱琳（Grace）在台慶夜一句「粉身碎骨」成為一時佳話，昨日她應邀為美容店擔任剪綵嘉賓，過程中並沒有再講四字成語，她坦承中文程度不好，這方面會向男友鄭嘉穎請教，也不介意成為市民茶餘飯後的笑柄，反而高興自己終於有「金句」。

Grace昨日為美容中心擔任剪綵嘉賓，未知是否錯用四字成語成為笑柄，活動上她不敢講太多，事後受訪時問她是否擔心又講錯話？她連忙帶笑補鑊：「生意興隆！」對於自己在大騷上失言，Grace說：「其實都係好事，即場有Do姐（鄭裕玲）糾正，亦教番自己下次唔會再犯錯。（男友話你拍劇成日講錯四字成語。）最近同阿Ben（黃智賢）做對手戲，好多時我都會講錯對白，佢都話唔明我講乜。」

當畀觀眾歡樂

Grace的爸爸中文程度甚高，當晚他睇電視見到她出錯，可有怪責她？Grace又再用錯詞語，她說：「中文方面我會『投靠』爸爸，其實佢睇完後都覺得好搞笑。」嘉穎日前力撑女友，指她的風格富娛樂性，Grace笑謂：「台慶應該開心嘅，要帶畀觀眾歡樂，就當送畀TVB嘅禮物啦！」問她可擔心日後成為大家的笑柄？她繼續發揮其阿Q精神：「好事呀，入行咁耐都未有金句，（想學黎明做金句王？）唔係，其實件事可以好正面，好過自責呀。」Grace又表示，男友有時都會向她請教英文，最近還一齊學國語。

為嘉穎缺席解畫

此外，嘉穎曾表示台慶當日仍身在北京，事後卻被揭穿當晚在大坑與朋友吃飯。Grace解釋：「佢喺嗰日返嚟下午到，可能有啲攰，到夜晚先約朋友食飯，佢呢排忙緊宣傳電影，所以想休息多少少，（佢冇睇你喺台慶演出？）可以之後睇番㗎嘛！」

採訪：Pauline

編輯：林梓添

設計：梁政敏