現年81歲的李家鼎（鼎爺），十年前憑《阿爺廚房》爆紅，本應老來無憂，惟前妻施明晚年遭同住的大仔李泳漢完全掌控，鼎爺為讓前妻安好，被迫長期做大仔一家的「人肉提款機」。直至施明離世，鼎爺再無顧慮，主動接受媒體訪問，公開多段WhatsApp及電話錄音，力證李泳漢多年苛索惡行，怒斥大仔兩公婆：「死X街，係咪人呀！」父子關係正式決裂。
同場加映：
Healthy Life｜健身教練教2個動作強化腹臀肌肉 緩解全日久坐疲勞
鼎爺公開錄音泳漢錄音 證謀200萬定期逼認保單
根據鼎爺向媒體公開的錄音內容，李泳漢對父親財產瞭如指掌，甚至連200萬定期存款何時到期都計算在內：
你有冇搞X錯……你話你定期8月開始，你有200萬點解俾唔到？又唔係要你一次過俾。我即日已經打咗俾Agent，認X咗張單，簽X咗喇喎！
我唔係嗰日認咗張單，我使乜嗰日唔俾你走？坐低認X咗條數去……
李家鼎自揭不獲續約 李泳漢以「高中學歷都冇」拒搵工
不但如此，由於年事已高，鼎爺表示自己將不獲續約，工作大減，提出「減供養費」。李泳漢即大怒發爛，指此舉「趕絕」他。鼎爺勸他搵工養家，泳漢竟以「高中學歷都冇」為由，理直氣壯做無業漢，甚至手握九龍塘碧涵別墅屋契作脅：
而家屋契喺我手，我掟X咗去銀行，你吹呀！我仲有好多嘢玩。
李泳漢否認苛索 反指細佬李泳豪拎走340萬
面對鼎爺指控，李泳漢隨即「反駁隊」上身。他接受媒體訪問，否認曾拿取200萬，更反指鼎爺銀行戶口早已被細佬李泳豪及弟婦Agnes控制。
李泳漢稱，2023年施明出院康復期間，細佬夫婦已勸母親賣掉九龍塘大屋分錢。他更指去年6月，鼎爺曾慌張來電求助，稱自己被泳豪夫婦操控，連網上銀行帳戶訊息都被更改，無法動用資金。泳漢陪鼎爺到銀行改資料，其後鼎爺告知泳豪要分家，每人250萬。
李泳漢續指，一星期後鼎爺拿著月結單說已分了300萬給泳豪，戶口接近清零，沒幾天又額外轉了40萬給同一戶口。他引述鼎爺說：「泳豪夫婦拿完錢謝謝都沒有，還侮辱他：『你估你煮嘢真係好好食呀？』」，強調「我冇拎過一分錢，不停講錢嗰個係李泳豪！」。
解穢酒扮孤伶 否認鼎爺親口「唱衰」
早前，李泳漢在施明喪禮解穢酒場外受訪，扮「孝子」表示：「我啱啱冇咗媽媽，唔想冇埋老竇，我已經覺得好lonely。」又透露當日鼎爺在親戚面前親口承認「全部嘢都唔係佢講」，質疑背後有人想「整死」自己。他說：
有報道話鼎爺出錢買媽媽新床，其實係我自己用4萬蚊買……佢哋只係想借我爸爸把口整死我。
李泳漢最終表示：「我相信天有眼，真相公開會還我清白，但最擔心鼎爺情況。」
鼎爺正式託付幼子泳豪為執行人
面對長子連日反駁，鼎爺在訪問中作出終極聲明，宣布將所有事務及財產，全權託付予幼子李泳豪處理：
我想將來我所有嘢，包括錢銀，交俾我細仔（泳豪）去處理。
他解釋，自己年事已高、身體欠佳，交租等日常事項現已由泳豪代辦。為防日後百年歸老，大仔會「代他講另一套」，鼎爺強調：
我完全肯定由細仔為我交代嘅嘢先係啱，大仔講嘅完全錯。
而施明離世後，鼎爺再無顧慮，決心斬斷與長子一家的聯繫：「我唔想再見佢哋，佢哋唔係人嚟。」同時透露，過去聘請兩名外傭，一名服侍施明、另一名照顧大仔一家，薪金全由他支付。如今他將終止相關合約：
而家唔關我事，佢自己搞掂，我最愛嘅人都走咗，我仲理佢（泳漢）仲乜？其實我清醒咗好耐，過去我只係睇在施明同啲孫份上咋。
泳豪低調回應：會照顧好家人
面對父親的託付及兄長的指控，李泳豪未有公開參與罵戰，僅在社交平台低調發文，宣布復工並寫道：
重回工作崗位……我會好好處理每一件事情和照顧好我的家人，Fighting with no fear。