祖兒《歌手4》包尾 劉浩龍唔信有黑幕

容祖兒參加內地騷《我是歌手4》鎩羽而歸，男友劉浩龍（師兄）雖沒有到場打氣，不過當晚已在instagram留言安慰，師兄透露祖兒失落比賽一刻確是不開心，不過對於有傳賽果有黑幕，他表示不可信。

劉浩龍昨日舉行新碟Pop concert，經理人黃柏高（Paco）也現身撑場。師兄在活動上獻唱多首歌曲，又與粉絲玩遊戲，令現場氣氛高漲。

相隔四年再出新碟，師兄對昨日表現得緊張，更刻意減掉十幾磅見歌迷。他表示：「其實最緊張反而係Paco出現，喺佢面前唱Live，點都會多幾分努力。」

至於談到女友祖兒失落《我是歌手4》歌王寶座，師兄表示：「本身同祖兒都很少喺社交平台有互動，甚至講關於工作嘅事。」又問到會否計劃陪祖兒出外散心？師兄表示他們都忙於工作，暫時未有計劃去旅行。當提到有很多粉絲替祖兒感不值，師兄表示明白粉絲都很愛錫祖兒。那祖兒可有不開心？他說：「嗰一刻有少少啦。（覺得有黑幕？）唔相信有，表演嚟啫，去到都賺咗，佢同我都賺咗，可以睇到佢點樣去做好。」

撰文：Pauline

編輯：林梓添

設計：鄧俊明