李佳芯遊日冇預男友

李佳芯（Ali）獲無綫力捧，演出機會接二連三，被一眾宅男封為「女神」的她，更有幸被車婉婉垂青，笑言倘若飲醉，一定會借醉攬住Ali。

無綫劇集《與諜同謀》前晚舉行煞科宴，李佳芯剛拍完另一劇集《律政強人》，即緊接拍《與》劇，令她無暇休息，如今兩劇煞科，笑言終於可以休息，問她可是與男友陳炳銓去旅行？Ali表示：「我自己一個人去，都要Plan下。其實自從入行後，每年都會去旅行。（唔搵朋友去？）我比較自閉，因為朋友啲時間難遷就，我嘅時間比較彈性，所以自己一個去，計劃去日本。」問到何不趁空檔搵真銀？Ali稱因日前行了婚紗騷，才令到旅行計劃押後。

婉婉性感有底綫

車婉婉是當晚煞科宴的酒樓老闆，問到她是否包底請食飯，她說：「我負責出紅酒，大家咁開心又拍得咁辛苦。（飲到醉？）唔知，飲到醉未必開心，大家夠就OK，我會無限量供應（紅酒）。」有指龔嘉欣因飲醉酒攬黃宗澤，問到婉婉會否擔心「出事」？她笑說：「如果飲醉梗係攬李佳芯啦，喺劇入面佢係我好朋友。」婉婉表示做歌手時甚少這類煞科宴，她慶幸今次有好多好好的合作夥伴。

問她會否想多機會參與電視劇？她直認不諱說：「係呀！好多角色都想試，我又唔係走玉女路綫，彈性好高，其實都啱做。」

問到性感又是否有底綫？婉婉表示相信監製的判斷，只要跟老公講聲，令他明白劇本點解她要性感就沒有問題，總之她的底綫就是電視尺度的底綫。

撰文：Pauline

編輯：林梓添

設計：鄧俊明